சின்னத்திரை நடிகர் சங்கத் தலைவராக சிவன் ஸ்ரீனிவாஸ் தேர்வு

                         

சின்னத்திரை நடிகர் சங்கத் தலைவராக சிவன் ஸ்ரீனிவாஸ் தேர்வு செய்யப்பட்டுள்ளார்.

சின்னத்திரை நடிகர் சங்கத்துக்கான புதிய நிர்வாகக் குழுவை தேர்வு செய்யும் தேர்தல் சென்னையில் வெள்ளிக்கிழமை நடைபெற்றது.

1,340 உறுப்பினர்கள் அங்கம் வகிக்கும் இந்தச் சங்கத்தில் தலைவர், துணைத் தலைவர், பொதுச் செயலாளர், பொருளாளர், செயற்குழு உறுப்பினர்கள் என மொத்தம் 23 பதவிகளுக்கு தேர்தல் நடத்தப்பட்டது.

நடிகர்கள் சிவன் ஸ்ரீனிவாஸ், பானு பிரகாஷ், ரவி வர்மா ஆகிய மூன்று பேர் தலைமையில் மும்முனைப் போட்டி நிலவியது.

காலை 8 மணிக்குத் தொடங்கி, மாலை 5 மணி வரை நடந்த இந்தத் தேர்தலில் சின்னத்திரை நடிகர் சங்கத்தைச் சேர்ந்த 705 உறுப்பினர்கள் வாக்களித்தனர்.

வெள்ளிக்கிழமை மாலை 7 மணிக்குத் தொடங்கிய வாக்கு எண்ணிக்கை நள்ளிரவு தாண்டியும் நீடித்தது.

இந்த நிலையில் சனிக்கிழமை காலை அதிகாரப்பூர்வ அறிவிப்பு வெளியானது. இதில் சங்கத் தலைவராக சிவன் ஸ்ரீநிவாஸ் 280 வாக்குகள் பெற்று வெற்றி பெற்றதாக அறிவிக்கப்பட்டது.